Узровень выкарыстання - не менш за 90 працэнтаў. Мінпрыроды прапануе абмеркаваць стратэгію па абыходжанні з адходамі

12 мая, Мінск /Кар. БЕЛТА/. На грамадскае абмеркаванне вынесены праект пастановы Савета Міністраў "Аб Стратэгіі па абыходжанні з адходамі вытворчасці і спажывання ў Рэспубліцы Беларусь", паведамляе БЕЛТА са спасылкай на Нацыянальны прававы інтэрнэт-партал.

У дакуменце асноўны ўпор зроблены на максімальнай перапрацоўцы адходаў вытворчасці і спажывання. Асноўная задача - фарміраванне комплекснай сістэмы абыходжання з адходамі, накіраванай на забеспячэнне да 2040 года ўзроўню выкарыстання адходаў не менш за 90 працэнтаў.

Праект падрыхтаваны з улікам выканання прынцыпу вугляроднай нейтральнасці (звядзення выкідаў парніковых газаў да нуля або іх кампенсацыі за кошт рэалізацыі экалагічных праектаў, накіраваных на паглынанне вуглякіслага газу пры энергетычным выкарыстанні адходаў). Не прадугледжваецца павелічэнне колькасці адміністрацыйных працэдур, што ажыццяўляюцца ў адносінах да суб'ектаў гаспадарання.

Арганізатарам грамадскага абмеркавання выступае Міністэрства прыродных рэсурсаў і аховы навакольнага асяроддзя. З 12 па 22 мая заўвагі і прапановы можна выказаць у спецыяльнай тэме на Прававым форуме Беларусі.-0-