Намеснік кіраўніка Мінпрыроды - першакурснікам: работа эколага патрабуе ўнутранага стрыжня і поўнай самааддачы
31 жніўня, Мінск /Кар. БЕЛТА/. Намеснік міністра прыродных рэсурсаў і аховы навакольнага асяроддзя Аляксандр Гарошка наведаў Міжнародны дзяржаўны экалагічны інстытут імя А.Д. Сахарава Беларускага дзяржаўнага ўніверсітэта, дзе прыняў удзел ва ўрачыстым мерапрыемстве для студэнтаў-першакурснікаў, прысвечаным пачатку новага навучальнага года. Аб гэтым паведамілі БЕЛТА ў прэс-службе Міністэрства прыродных рэсурсаў і аховы навакольнага асяроддзя.
У Беларусі Міжнародны дзяржаўны экалагічны інстытут імя А.Д. Сахарава з'яўляецца вядучым у сферы экалагічнай адукацыі. Інстытут вядзе сістэмную, мэтанакіраваную дзейнасць па распрацоўцы праграм падрыхтоўкі і павышэння кваліфікацыі спецыялістаў у галіне аховы навакольнага асяроддзя і рацыянальнага прыродакарыстання.
Аляксандр Гарошка павіншаваў наваспечаных студэнтаў з надыходзячым Днём ведаў і адзначыў, што ў бягучым годзе гэта дата для іх лёсавызначальная. "Вы зрабілі важны крок у жыцці - выбралі прафесію эколага і паступілі ва ўніверсітэт. Няхай гэта яшчэ зусім маленькі крок, але, магчыма, менавіта ён вызначыць вашу будучыню. Бо быць эколагам - няпростая праца, гэта рэальная штодзённая работа на карысць чалавецтва і планеты, якая патрабуе ўнутранага стрыжня і поўнай самааддачы", - сказаў Аляксандр Гарошка.
Таксама ён падкрэсліў, што экалагічныя веды, якія атрымліваюць ва ўніверсітэце, прымяняюцца ў розных сферах чалавечай дзейнасці - эканамічнай, медыцынскай, сацыяльнай і іншых.
