Якія задачы ўвайшлі ў праграму дзейнасці ўрада на 2025-2029 гады

Прэм'ер-міністр Беларусі Аляксандр Турчын падпісаў пастанову "Аб зацвярджэнні праграмы дзейнасці ўрада Рэспублікі Беларусь на 2025-2029 гады", паведамілі БЕЛТА ў прэс-службе ўрада.

Праграма складаецца з трох раздзелаў. Першы - павышэнне ўстойлівасці эканомікі. Асноўныя задачы - скарачэнне (ліквідацыя) субсідзіравання ў сферы жыллёва-камунальных паслуг і транспарту, увядзенне дыферэнцыраванай аплаты за звышспажыванне камунальных паслуг, забеспячэнне даўгавой устойлівасці (паэтапнае зніжэнне даўгавой нагрузкі), стварэнне спрыяльных умоў для інвесціравання і паляпшэнне бізнес-асяроддзя.

Другі раздзел - прыярытэтныя напрамкі сацыяльна-эканамічнай палітыкі. У напрамку развіцця чалавечага патэнцыялу асноўнымі задачамі сталі перагляд сістэмы падтрымкі сем'яў (акцэнт на яе адраснасць), захаванне і ўмацаванне рэпрадуктыўнага здароўя (дзве бясплатныя спробы ЭКА), мадэрнізацыя сістэмы адукацыі, павышэнне даступнасці і якасці аховы здароўя. У напрамку новых стандартаў якасці жыцця - забеспячэнне насельніцтва даступным арэндным жыллём (у тым ліку яго выкуп), паляпшэнне транспартных зносін паміж рэгіёнамі, рэнавацыя тэрыторый населеных пунктаў. Для развіцця сферы паслуг урад будзе займацца ўмацаваннем сферы турызму (стварэнне 70 рэгіянальных турыстычных інфармацыйных цэнтраў, перафармаціраванне гасцініц і санаторыяў пад сусветныя патрабаванні), павышэннем якасці бытавога абслугоўвання, пашырэннем тавараў айчыннай вытворчасці. У напрамку лічбавізацыі асноўныя задачы - развіццё лічбавай дзяржавы, стварэнне і выкарыстанне праграмнага забеспячэння. Для тэхналагічнай самадастатковасці перад урадам стаяць задачы па забеспячэнні апераджальнага развіцця вытворчасцей з высокай дабаўленай вартасцю, высокатэхналагічных відаў дзейнасці, павышэнні ўзроўню лакалізацыі прамысловай прадукцыі.

Акрамя таго, у напрамку "ўнікальнасць кожнага рэгіёна" асноўнымі задачамі сталі - развіццё ўнутрыабласных агламерацый і гарадоў-спадарожнікаў, пашырэнне прымянення тэхналогій дакладнага земляробства, а ў напрамку "экалогія і рацыянальнае прыродакарыстанне" - лічбавая трансфармацыя лясной гаспадаркі, забеспячэнне бяспекі ядзерных адходаў, развіццё сістэмы абыходжання з адходамі, пашырэнне сферы прымянення другасных матэрыяльных рэсурсаў.

Трэці раздзел - развіццё экспартнага патэнцыялу. Асноўныя задачы тут - якасны рост і дыверсіфікацыя экспарту, фінансавая і нефінансавая падтрымка экспарцёраў.

Пастанова ўступае ў сілу з дня яе прыняцця.

7 мая праграма дзейнасці ўрада на 2025-2029 гады адобрана Палатай прадстаўнікоў.-0-