Унікальнасць: Разам з запаведнікам «Чапкяляй» (Літоўская Рэспубліка) заказнік «Котра» з’яўляецца трансгранічнай асабліва ахоўнай прыроднай тэрыторыяй, а таксама мае статус водна-балотнага ўгоддзя міжнароднага значэння.
Заказнік уяўляе сабой буйны лесабалотны комплекс у вярхоўях ракі Котры. Тут прысутнічаюць усе тры тыпы балот: верхавыя, пераходныя і нізінныя.
Адметная асаблівасць заказніка – гэта багацце і разнастайнасць расліннага і жывёльнага свету, некранутасць прыроды і адсутнасць чалавечага фактару.
Месца пражывання такіх рэдкіх відаў, як чорны бусел, пугач, жоўтагаловы дзяцел, барсук, чмель Шрэнка і інш. У Чырвоную кнігу занесена 12 відаў раслін, прадстаўленых на дадзенай тэрыторыі. У заказніку выяўлена пражыванне такіх чырванакніжных дзікіх жывёл, як рысь і барсук.
У акваторыі ляснога возера Краскова сфарміравалася выключна рэдкае для Беларусі згуртаванне з панаваннем гарлачыка чатырохграннага.
Паслугі ў галіне экатурызму: Арганізацыя па тэрыторыі заказніка турыстычных экскурсій/прагулак для дзяцей, дарослых і арганізаваных груп; пракат веласіпедаў і турыстычных палатак з надзіманымі матрацамі. Абсталявана 8 месцаў адпачынку, дзе можна разбіць турыстычны лагер.
Экалагічныя маршруты: Экалагічная сцежка заказніка Котра (2 км). Пешыя турыстычныя маршруты (6 км, 14 км).
Славутасці: Пасяленне чалавека бронзавага і каменнага вякоў; унікальны комплекс дзюнна-ўзгоркавых град на водна-ледніковай раўніне; мемарыяльны комплекс “Агародзішча” на месцы спаленай нямецкімі захопнікамі вёскі.