Дзень экалогіі прайшоў у НДЦ «Зубраня»
Навіны
30.08.2022 | 11:10
4 жніўня 2022 г. ва ўстанове адукацыі «Нацыянальны дзіцячы адукацыйна-аздараўленчы цэнтр «Зубраня» пад эгідай Міністэрства прыродных рэсурсаў і аховы навакольнага асяроддзя ва ўрачыстай атмасферы прайшоў Дзень экалогіі. Ведамства ў сваёй рабоце ўдзяляе асаблівую ўвагу экалагічнаму выхаванню, навучанню і асвеце дзяцей і моладзі.
У госці да выхаванцаў НДЦ «Зубраня» прыехалі прадстаўнікі Мінпрыроды, Мінскага абласнога камітэта прыродных рэсурсаў і аховы навакольнага асяроддзя, Рэспубліканскага цэнтра дзяржаўнай экалагічнай экспертызы і павышэння кваліфікацыі Мінпрыроды, Цэнтральнага навукова-даследчага інстытута комплекснага выкарыстання водных рэсурсаў, рэспубліканскага навукова-даследчага прадпрыемства «Бел НДЦ «Экалогія», Рэспубліканскага цэнтра аналітычнага кантролю ў галіне аховы навакольнага асяроддзя.
Мерапрыемствы праходзілі на некалькіх лакацыях з улікам розных узроставых груп дзяцей, каб захапіць і перанесці кожнага ў дзіўны свет экалогіі.
Так, для навучэнцаў 10 – 11 класаў была арганізавана дыялогавая пляцоўка на тэму «Удзел моладзі ў вырашэнні экалагічных задач». Акрамя неабыякавасці да экалагічных праблем некаторыя старшакласнікі выказалі жаданне ў будучым стаць дыпламаванымі эколагамі, каб не толькі ў звычайным жыцці, але і ў прафесіі прыносіць максімальную карысць, абараняючы прыроду.
Для дзяцей малодшых былі праведзены віктарыны, актыўнасці і разнастайныя гульні прыродаахоўнай тэматыкі. Шмат цікавасці ў дзяцей розных узростаў выклікала дэманстрацыя выпрабаванняў на базе мабільнай экалагічнай лабараторыі.
Дзень завяршыўся флэш-мобам «Я люблю сваю краіну»: выхаванцы НДЦ «Зубраня» выстраіліся ў фігуру «сэрца» і памахалі адлятаючаму высока ў неба квадракоптару.
