9 снежня, Мінск /Кар. БЕЛТА/. Прадстаўнік Мінпрыроды прыняў удзел у круглым стале па рэалізацыі Базельскай канвенцыі па тэме "Трансгранічнае перамяшчэнне былога ва ўжыванні камп'ютарнага абсталявання і іншых адходаў электрычнага і электроннага абсталявання", паведамілі БЕЛТА ў прэс-службе ведамства.
Арганізатарамі круглага стала выступілі Рэгіянальны цэнтр Базельскай канвенцыі ў Браціславе (Славакія) і праграма Unistar/Scycle пры падтрымцы сакратарыята Базельскай канвенцыі аб кантролі за трансгранічнай перавозкай небяспечных адходаў.
На мерапрыемстве разглядаўся вучэбны дапаможнік па кантролі за трансгранічным перамяшчэннем адходаў электроннага і электрычнага абсталявання ў адпаведнасці з палажэннямі Базельскай канвенцыі і прынцыпамі экалагічна бяспечнага кіравання, распрацаваны праграмай Unistar/Scycle, а таксама працэдуры экспарту, імпарту і кантролю за трансгранічным перамяшчэннем адходаў электрычнага і электроннага абсталявання.
У час круглага стала кансультант упраўлення рэгулявання абыходжання з адходамі галоўнага ўпраўлення рэгулявання абыходжання з адходамі, біялагічнай і ландшафтнай разнастайнасці Міністэрства прыродных рэсурсаў і аховы навакольнага асяроддзя Беларусі Кацярына Чычко прадставіла агляд заканадаўства ў галіне кантролю за трансгранічным перамяшчэннем небяспечных адходаў у краіне.
Удзельнікамі круглага стала быў адзначаны станоўчы вопыт Беларусі ў рэалізацыі палажэнняў Базельскай канвенцыі аб кантролі за трансгранічнай перавозкай небяспечных адходаў, асабліва высокі ўзровень арганізацыі работы, якая праводзіцца ў краіне па прадухіленні незаконнага абароту небяспечных адходаў.-0-