Унікальнасць: Заказнік размешчаны на тэрыторыі Налібоцкай пушчы – аднаго з самых вялікіх і старажытных лясных масіваў у Рэспубліцы Беларусь і ва ўсёй Усходняй Еўропе. Пранізаная шматлікімі ручаямі і рэкамі пушча ўяўляе сабой унікальны прыродны комплекс, які стаў домам для мноства рэдкіх раслін і жывёл. Менавіта Налібоцкая пушча з’яўляецца генетычным рэзервуарам для стронгі і ліпеня.
У заказніку знаходзіцца адзіны ў Беларусі гадавальнік па вырошчванні глушцоў. Яго галоўная задача – захаваць заходнееўрапейскі падвід так званага глушца Маера, які знаходзіцца на мяжы знікнення. Усяго ў Беларусі налічваецца прыкладна 400 асобін, большасць з іх – у Налібоцкай пушчы. Разам з тым, у краінах ЕС – Польшчы, Германіі, Літве – глушэц Маера практычна знік у дзікай прыродзе.
Тут пражываюць больш за 50 відаў жывёл, якія знаходзяцца пад аховай Чырвонай кнігі Рэспублікі Беларусь. У заказніку таксама пражывае адна з самых буйных на тэрыторыі Беларусі папуляцый зубра, якая налічвае каля 90 асобін. Заказнік адыгрывае вялікую ролю ў захаванні папуляцый многіх птушак падчас гнездавання, зімоўкі і міграцыі, ён мае статус ключавой батанічнай тэрыторыі і тэрыторыі, важнай для птушак.
Адзінае месца ў Беларусі, дзе жывуць сотні дзікіх тарпанападобных коней пароды конік, якіх у 2019 годзе на бязвыплатнай аснове перадалі заказніку Нідэрланды.
Паслугі ў галіне экатурызму: Веласіпедныя экскурсіі па Налібоцкай пушчы; байдарачныя сплавы па рацэ Іслач; абсталяваныя стаянкі для байдарачнікаў і турыстаў на беразе ракі Іслач; наведванне экалагічных сцежак; пракат веласіпедаў, электравеласіпедаў, байдарак і турыстычнага інвентару; наведванне гадавальніка па ўзнаўленні цецеруковых; турыстычныя стаянкі для ўстаноўкі палатачных лагераў і проста адпачынку на прыродзе (усе стаянкі маюць навесы, столікі, лавачкі, абсталяваныя месцы для вогнішча). Штогод у пушчы праходзіць марафон «Налібокі» (марафон, веласіпед, бег, мультыспорт).
Экалагічныя маршруты: Веласіпедныя маршруты па Налібоцкай пушчы (ад 4–6 км да 12 км, 30 км і 38 км); экалагічная сцежка «Сябрынскае скрыжаванне» (960 м, даступная для асоб з інваліднасцю); экалагічная сцежка «Белакорац» (даступная для людзей з абмежаванымі магчымасцямі, бацькоў з нованароджанымі дзецьмі, людзей трэцяга ўзросту).
Славутасці: Возера Кромань; Гальшанскі замак; Любчанскі замак; руіны сядзібы і фоталабараторыі Тышкевічаў.
