Старшынёй Міждзяржаўнага экалагічнага савета дзяржаў - удзельніц Садружнасці Незалежных Дзяржаў (СНД) на чарговы перыяд выбраны міністр прыродных рэсурсаў і аховы навакольнага асяроддзя Беларусі Сяргей Масляк. Аб гэтым
паведаміла карэспандэнту БЕЛТА начальнік аддзела міжнароднага супрацоўніцтва Мінпрыроды Ларыса Лукіна.
На працягу ўсяго бягучага года Беларусь будзе вядучай дзяржавай на прыродаахоўнай пляцоўцы. "Міждзяржаўны экалагічны савет быў створаны для каардынацыі дзейнасці дзяржаў - удзельніц СНД у галіне аховы навакольнага асяроддзя, устойлівага выкарыстання прыродных рэсурсаў і змякчэння наступстваў змянення клімату. Гэта пляцоўка актыўна выкарыстоўваецца ўдзельнікамі для абмеркавання і пошуку вырашэння праблем у прыродаахоўнай сферы", - адзначыла Ларыса Лукіна.
У штаб-кватэры СНД у Мінску адбылося XI пасяджэнне Міждзяржаўнага экалагічнага савета дзяржаў - удзельніц СНД. У ім прынялі ўдзел пастаянныя члены савета, а таксама прадстаўнікі дзяржаў-наглядальнікаў.
Сярод асноўных пытанняў былі правядзенне ацэнкі ўздзеяння на навакольнае асяроддзе, кіраванне воднымі рэсурсамі, сумесная работа на трансгранічных асабліва ахоўных прыродных тэрыторыях, а таксама работа дзяржаў - удзельніц СНД па стварэнні прававой базы і прадастаўленні экасістэмных паслуг.-0-
