Белавежская пушча, экалагічная свядомасць і турызм. У Мінпрыроды абмеркавалі работу з грамадскасцю

30.12.2022
30 снежня, Мінск /Кар. БЕЛТА/. У Мінпрыроды правялі падагульняючае пасяджэнне грамадскага каардынацыйнага экалагічнага савета пры Міністэрстве прыродных рэсурсаў і аховы навакольнага асяроддзя з удзелам усіх рэгіянальных экалагічных саветаў пры тэрытарыяльных органах ведамства. Аб гэтым паведамілі БЕЛТА ў прэс-службе міністэрства.

У мерапрыемстве, якое прайшло пад старшынствам міністра прыродных рэсурсаў і аховы навакольнага асяроддзя Андрэя Худыка, прынялі ўдзел прадстаўнікі рэгіянальных грамадскіх аб'яднанняў, устаноў адукацыі і культуры, царквы, сродкаў масавай інфармацыі, а таксама грамадскія эколагі.
 
Кіраўнік прыродаахоўнага ведамства падкрэсліў важную ролю неабыякавых у павышэнні інтарэсу грамадства да пытанняў аховы навакольнага асяроддзя. "Вы на асабістым прыкладзе, экалагічна дружалюбных паводзінах, не толькі кожны дзень агучваючы задачы, але і вырашаючы іх у канструктыўным рэчышчы, уносіце вялікі ўклад у фарміраванне грамадскай экалагічнай свядомасці і культуры нашых суайчыннікаў на аснове праўдзівай і аператыўнай інфармацыі", - заявіў Андрэй Худык.
 
Работа рэгіянальных экалагічных саветаў сістэмы Мінпрыроды дала магчымасць у бягучым годзе далучыць больш як 450 чалавек да абмеркавання і вырашэння больш як 70 прыродаахоўных пытанняў.

Міністр прыродных рэсурсаў і аховы навакольнага асяроддзя таксама ўдзяліў асаблівую ўвагу пытанню ўзвядзення штучных загарод у трансгранічных запаведных зонах, а менавіта, на тэрыторыі аб'екта Сусветнай спадчыны ЮНЕСКА "Белавежская пушча". Міністр выказаў удзячнасць удзельнікам пасяджэння за ўключэнне шырокага кола грамадскасці ў абмеркаванне гэтага пытання. Акрамя таго, ён паабяцаў удзельнікам пасяджэння прадоўжыць работу на міжнародных пляцоўках для ўрэгулявання гэтай праблемы.
 
Таксама на пасяджэнні ўдзельнікі абмеркавалі перспектывы развіцця і пашырэння экалагічнага турызму на базе дзяржаўнай прыродаахоўнай установы "Рэспубліканскі ландшафтны заказнік "Налібоцкі".
 
Удзельнікі мерапрыемства былі праінфармаваны аб прадаўжэнні работы па забеспячэнні доступу да інфармацыі і ўдзелу грамадскасці ў працэсе прыняцця рашэнняў. Было адзначана, што Мінпрыроды забяспечыць актыўную работу ў гэтым напрамку сумесна з правапераемнікамі Орхускіх цэнтраў, якія прадоўжаць сваю работу над новымі найменнямі.-0-

БЕЛТА - Навiны Беларусi

Версія для друку Усе навіны